何廣沛認擁有成人網站會藉 陳曉華不介意男友睇A片：加佢分！

何廣沛和陳曉華今日（3/1）現身荔枝角出席無綫劇集《異搜店》宣傳造勢活動。提到日前亮相自家製「食腦」頻道中，被好兄弟方紹聰大爆其擁有成人網站VIP會藉，令他感到非常尷尬。何廣沛笑言：「其實確有此事。但我就覺得呢啲係好正常嘅事嚟，而且係真男子會做嘅事。如果我否認嘅話，我就係一名偽君子。不過而家我就取消咗個會藉冇再睇，而美好嘅時光係好短暫，只係用咗半個月，就被人盜用咗個戶口。呢頭我分享咗俾郭子豪同方紹聰，之後個戶口就冇咗，所以我懷疑佢哋兩個手腳唔乾淨，將個密碼外洩咗。」

而陳曉華就覺得男性上成人網站睇性AV片屬正常事：「其實我都接受到另一伴去睇呢啲片㗎！（會唔會一齊睇？）唔⋯⋯哈哈！其實我真係冇聽過可以做會員呢樣嘢，所以我就覺得有啲驚喜。如果我男友有做會員，我諗我會加佢分。」何廣沛聽到加分兩字，表現驚訝即刻睜大雙眼望住對方。陳曉華即時說：「咁呢啲正常嘢嚟嘛！（咁會唔會一齊睇？）咁唔會囉。我諗我會拉埋佢一齊睇浪漫嘅嘢多啲。」何廣沛笑說：「哦，原來大家喜愛唔同。」