葉念琛或再同吳卓羲合作喜劇 回應拍攝港版《Penthouse》進展

葉念琛（Patrick）今日（18日）新城電台接受薛家燕主持的節目《開心大派對》訪問，由他指導的驚悚片《致命24小時》將於明年1月6日上映，今次是首次同吳卓羲（Ron）合作，但一來竟是要對方做一個斯文敗類，他說：「其實有好多背後原因，唔係單純一個反派，我同卓羲識咗好多年，間中都會傾下合作，今次係有機會一齊去做呢套戲都好開心。」

眾所周知，Patrick多以拍愛情戲為主，因此找到三位主演湯怡（Kathy）、Ron、潘燦良時，大家都以為是愛情片，結果卻是另一個極端：「個個都（以為）係啦，燦哥都話以為搵佢拍愛情戲，點知一嚟到打到個女主角飛起，湯怡都係，被人打到飛起。（之後搵Ron再拍愛情戲？）我覺得如果再搵拍喜劇啦，即係我同佢（合作）好開心，大家都可以再開放啲。」

本月初有指曾志偉打算翻拍韓劇《Penthouse》，邀Patrick一起打造港版，由四大力捧花旦陳瀅、劉佩玥、蔡潔、蔣家旻主演，對此他回應道：「劇本處理中，一切嗰啲詳情留返畀TVB，而家密鑼緊鼓做緊個創作。（喺韓劇基礎上再創作定全新故仔？）我諗到時再公布，即係cast或者個內容，遲啲可能TVB公布。」