陳美濤想打小人擊退情敵 但怕有報應：覺得做呢啲嘢會有代價
撰文：吳子生
出版：更新：
亞姐陳美濤今日（13/12）現身灣仔出席電影選角活動，更即場性感演繹「打小人」，邊念口訣邊用拖鞋起勢打，盡顯手法純熟落力到位。美濤表示：「我之前係冇打小人嘅經歷。不過之前我遇過有情敵嘅時候，係有諗過想去打小人。但後來我就冇咁做，係因為我覺得做呢啲嘢係會有代價，你去打人哋，令到人哋個運唔好，自己個運程都可能會差啲，所以最後我都冇打到。點知，男朋友最終揀咗第三個女仔，咁所以證明打小人係冇用。當你擊敗咗一個女仔，但呢個世界有千千萬萬嘅對手，咁所以就最重要做好自己。」