【有片】《四葉草》李雨陽自爆欠債40萬 蕭定一誘拍三級片
做得演員，有邊個唔想紅？事實上，就算有樣都未必可以包你星途成功，還要睇埋命水。就好似2003年以《當四葉草碰上劍尖時》初登熒幕的李雨陽，當時長髮的他，驟眼望都幾似日本明星吖。不過一套劇之後，他似乎就被埋沒，有樣又如何，在TVB 9年，李雨陽經常做二打六、不起眼的角色。冇乜工作機會，收入自然不理想，導致生活拮据。2012年，眼見香港電視爭取發牌，李雨陽覺得有發展機會，於是頭也不回地離開無綫，可惜HKTV最終不獲發牌，本來生活艱辛的他，更加孤立無援，諗落真係好黑仔。幸好天無絕人之路，機緣巧合下遇到生意夥伴，有意夾份賣原味雞，望有商機。結果，李雨陽賣雞生意尚算不錯，現時他中港兩邊走，做下生意又返大陸拍劇。回想過去，洗錢都要計較的日子，37歲李雨陽接受網媒《HongKongCard.com》訪問時，最感恩是沒有為片酬而拍難洗底的三級片，重蹈覆轍。
李雨陽加入娛圈9年裏，自言酬勞少。過去曾講過TVB合約充滿不平等，登台要申請，又不能出現在其他電視台，曝光率間接被控制。李雨陽開始兼職幫補生活，試過做售貨員，又試過到處搵嘢撈：「當時會周圍咁搲嘢做，除咗拍劇、拍電影之外，仲有商演，去登台。我自問對唱歌幾有信心，但會怯場。俾唔到信心人哋嘅時候，就唯有搲爛市去做，無論係幾平都做，咁樣去keep住去捱。咩Job都接，生活都真係好唔掂。」李雨陽雖然未去到捱麵包，但去街要同朋友諗過度過：「見到個銀包得返300蚊，今個月仲有兩星期，咁梗係唔出去啦。」
不過低處未算低，李雨陽講到最唔掂的日子，要搵財務公司借錢，一共借了30多40萬：「借咁多係為咗過生活，因為當時啲卡數，真係連minium charge都還唔起。借咗錢之後，就咩Job都接，2、3千蚊都接，慢慢捱去還清晒。」其後李雨陽都有講到，2011年蕭定一開拍三級片《3D肉蒲團之極樂寶鑑》，向過他招手，他也坦言片酬很吸引，差點答應接拍。不過，李雨陽經過一番考慮之後，最終懸崖勒馬：「當時有同TVB監製王心慰去傾，佢就同我講，你唔好睇有好多前輩都有拍過三級片，但都要嘥好多嘅時間去洗底，去令觀眾冇咗個三級片嘅影響。」這番說話都點醒了他：「雖然個片酬可以抵消債務，但拍完之後又影響咗我幾年嘅，咁我咪即係重蹈覆轍？呢幾年內又冇收入，咁筆數又孭返喺度，所以都係拒絕咗。」還好他沒有拍三級片，現在除了做老闆，間中返內地工作，在當地都有市場。當初失去，兼本來沒有的，現在開始賺回來。所謂天冇絕人之路，慢慢行，總有生機嘅！