星空下的仁醫｜鄭嘉穎搶救鍾嘉欣母子曬演技　BB道具造價達5位數

無綫台慶劇《星空下的仁醫》進入結局篇，Eman章以芯（鍾嘉欣飾）突然覺得個肚唔舒服更下體出血，要做緊急手術拎個BB出嚟，可惜因為確診感染病毒所以個BB救唔返。網友紛紛指拍得太真喊到眼腫，整個手術場面相當逼真，據知BB道具造價達5位數﹗

片段一開始Eman穿上手術袍下體出血，正被推往手術室，鍾嘉欣顯露出做母親的無助，握緊趕至身邊的鄭嘉穎托負要救BB令人動容。手術期間鍾嘉欣一度心跳停頓，最終成功搶救，可惜BB出世前已無心跳，即使鄭嘉穎聲淚俱下搶救都返魂乏術，令人相當心酸。網友大讚手術場面極度逼真，由剖腹至取出連住臍帶的BB，整個畫面無打格非常逼真，據知BB道具造價達5位數，頭髮臍帶等都按真實情況訂製，落足重本。

Eman醒來後見不到兒子，即無助地望向眾人，最終焚爺告知其兒子已離世；得悉殘酷現實的Eman先是一臉悲慟，又帶點難以置信，之後看到兒子遺體時，才逐漸變得激動兼不斷自責謂：「對唔住呀！媽媽害死你呀！」焚爺不想痛失愛兒的Eman再承受自責之苦，攬上身指是自己失誤害死Heman，Eman聽畢即時淚如泉湧，並激動反問焚爺：「你講乜嘢呀？你又話幫我睇住我個仔嘅？你講乜嘢呀？」

之後Eman再與焚爺真情對話，承認自己有幻覺，並傷心地表示知道是時候放下兒子：「我知道BB已經走咗，我知道我唔應該再見佢，但我真係好唔捨得佢，我唔想自己咁清醒，佢之前仲喺我個肚入面，我連同佢Say聲Sorry都冇機會。我好掛住佢，好掛住BB呀！」單是兩場喊戲，嘉欣已成功演繹了多種複雜情緒，對於網民一致好評，嘉欣越洋受訪時大表感謝，並透露入行以來每個角色，都有盡力去設計及演繹：「細個時演較年青嘅角色，喊嘅時候會簡單啲；但章以芯資歷相對多啲，我自己又進入咗另一階段做咗媽咪，所以處理喊戲時會唔同咗，因為要顧及嘅嘢多咗，會好自然地深層次咗。」嘉欣又謂該兩場重要喊戲均是由心而發、順其自然：「我只係投入咗個角色，畀自己嘅身體語言同思維自然流露出嚟，再隨住劇本嘅帶領以及當日嘅狀態，盡我全力去做好佢。」嘉欣又坦言做了媽咪後對演喊戲有幫助：「學套劇話齋，媽咪係有一種本能，我嘅本能就係更加connect到我自己嘅內心世界同情緒，即係痛可以更痛。」

談到網民指嘉欣乃是屆視后不二之選，嘉欣直言很感動：「再次多謝大家支持，真係對我好大鼓勵，我都有成五、六年冇乜演過戲，大家都仲記得同支持我，我非常感動。我對自己演出係有信心嘅，畢竟我演咗戲十幾年，未結婚之前我都拍咗成四十部劇，有好多訓練同進步嘅機會。章以芯我係好期待去演嘅，我亦好感恩呢個角色畀咗我好多學習機會，無論演戲抑或處事，我好多謝呢個角色。」