馬達·蓮娜｜周秀娜太入戲導致暴瘦　張繼聰：做女明星真係慘

由張繼聰、周秀娜主演的《馬達·蓮娜》為本屆香港亞洲電影節的開幕電影，周三（27日）兩位主演出席首映，表示對這部作品充滿信心，張繼聰談起這個劇本是10年難得一遇，自己在電影中飾演一名深情的士司機：「公司請咗的士大佬組團嚟睇，佢哋都睇到流下男兒淚。」他又繼指平時在日常生活都做慣「柴可夫」：「作為一個有風度嘅男士係長期都做，無論係老婆（謝安琪）同小朋友，其實我正職係司機。」

周秀娜提起今次的故事較為沉重：「拍攝期間好難得會有輕鬆嘅時候，一路拍都累積左啲唔開心嘅情緒，拍到後尾覺得自己就快抑鬱。」由於電影已拍完半年，現時經過時間洗禮已經完全抽離，張繼聰就指：「點都要抽離返出嚟，如果唔係一生人咪只可以拍一兩套戲？」

至於周秀娜近日被指消瘦到「得返棚骨」，她本人就覺得是「角度問題」：「拍呢套戲越拍越唔開心，胃口差就梗係愈來愈瘦，拍完返返嚟不嬲都好健康，但都多謝大家關心。」張繼聰不禁打抱不平：「做女明星真係慘，成日俾人話肥，瘦又俾人話瘦。」有港版Christian Bale之稱的他表示深有同感，認為健康最緊要。