梅小青睇好《法證先鋒5》 堅拒回巢再任監製：我有自己風格
撰文：鄺鈺瑩
出版：更新：
TVB嘅《法證先鋒》系列一直深受歡迎，去年播出嘅第四輯平均收視達36.3。第五輯雖然開拍在即，但男主角突然由周柏豪換成黃宗澤，而女主角亦由黃翠如變成蔡潔，再加上金牌監製梅小青去年退休，《法5》到底會否變質，外界都頗為關注。
梅小青同老公劉家豪今午出席粵劇《呂布情傾貂蟬》發佈會時，笑言自己係退而不休，仍然有關注娛樂圈動態，對於志偉升職一事亦感到十分高興。「希望喺佢帶領下大家會更好，其實我認識志偉多年，知佢好幫藝人、好關注大眾，希望佢繼續發放正能量出去。」小青姐表示志偉曾邀請她與家豪哥回巢，但由於退休生活實在太自在，所以拒絕了。「法證1-4係我好鐘意嘅劇集 ，而家去到5我都希望佢可以好好好 ，因為自己好有風格 ，一睇劇本會從頭執到尾 ，所以今次唔係好敢去掂 ，不如比佢一個創新 ，新人事新作風 ，我相信一定會做得好好。」