24個比利｜姪女曝光比利臨終一刻　真正結局與原著竟有出入？

行入書局，大家都可能在暢銷書架上見過《24個比利》（The Minds of Billy Milligan）和《比利戰爭》（The Milligan Wars），可能就擺在《被討厭的勇氣》隔離。就算你未睇過，都或者會好奇點解本書會長賣長有，連電影《思．裂》（Split）、《異能仨》（Glass）的啟發靈感都來自於《24個比利》。
兩本書都睇過的朋友，打開Netflix見到《24個比利》紀錄片登上香港熱門觀看前10名，可能會心思思諗應唔應該重睇一次。其實一睇無妨，因為書的結局講述主角比利好似已放低包袱，迎來一個美好結局，但原來紀錄片話你知，事實並非如此。

《24個比利》和《比利戰爭》分別出版於1981年及1994年，故事是真人真事，講述主角比利（真名為威廉密里根）在1977年連續犯下強暴和搶劫多項罪行，為警方所逮捕後才發現他是多重人格障礙患者，擁有24個或以上的人格，而患病的原因是他童年曾飽受繼父性侵和暴力對待。之後他在監獄中備受虐待，曾一度打算自殺。逾10年後，他在1988年終獲釋放，《比利監獄》尾聲交代他回到童年的家，直言自己已打算寬容對待一切。

比利在書中擁有一個美好結局。惟獲釋後的比利，直至他2014年患癌過世期間，消息都幾近杳然無蹤，Netflix紀錄片則交代了他的後續故事。書中比利已融合了24個人格，但他仍然飽受創傷所累。

Netflix紀錄片中訪問了比利的親友。原來獲釋後的比利曾經沉迷賭博、毒品、酗酒，家傳戶曉的他曾與在荷里活偕巨星阿諾舒華辛力加作伴遊玩。然而他的精神狀況浮浮沉沉，有時變得激動、好鬥、威脅身邊人話要「殺了你」，亦曾干犯不少輕微罪行。而得悉患癌後，比利十分恐懼，但毫不在乎自己身體狀況，繼續酗酒。

書中亦提到，獲釋後的比利曾捲入殺人案中，最終是否為兇手則不得而知。紀錄片訪問了比利的姪女，她是比利去世前的主要照顧者。她坦言，叔叔臨終前在病榻上詢問她：「你認為上帝會寬恕我這輩子中的所作所為嗎？我殺了人，你認為祂還會原諒我嗎？」似乎曾為殺人而懺悔。

此外，睇完本書的朋友應該對比利這號人物好奇非常，會上YouTube搜尋比利的片段。但大海撈針，啲片又少又殘缺又冇字幕，睇到你一頭霧水。Netflix今次重新整理了多條訪問片段，清晰呈現了比利人格轉換一刻，齋睇書就冇咁有畫面。

雖然睇就幾好睇，但第一集都幾無聊，介紹太多背景資料，營造懸疑氣氛多過講故仔，了解過吓比利故事的觀眾可以較1.5倍速飛過，又或上維基睇完就算，第二集講述比利成長故事先有啲睇頭。

雖然紀錄片想探討比利係咪真係有多重人格，抑或係演技派，所以刻意營造懸疑恐怖感，仲用《潛藏的怪物》做題，但其實可以減返少少。因為睇完比利的故事後，你絕對會傷感多於恐懼，他的人生是一個悲劇，而非恐怖故事。

同場加映

試當真 | 林家熙晒合照公開認愛Jeannie　張敬軒留言：閃到呢...