賈明昇認同吳紫韻獨處 被潘梓鋒誤會打爆眼角：朋友落街攞嘢

「賈明昇」鄒兆霆早前疑捲入「爭女事件」風波，有傳他暗溝TVB娛樂新聞台主播吳紫韻（Purple），而被《東張西望》男主持潘梓鋒(Bryan)襲擊受傷入院。有指案發當日Purple約了鄒兆霆返家食飯，但Bryan入屋後誤以為女友出軌，一怒之下出手打人，而事後潘梓鋒被控傷人罪，案件將排期審訊。

今日案中男主角鄒兆霆出席無綫新劇《四十二章經》拜神儀式時，就此事接受《香港01》訪問：「其實成件事都係一場誤會。而家傷勢都冇乜大礙，都係傷咗左眼角。不過都化到妝，可以遮到嘅。（縫咗幾多針？）都係幾針。（有指你暗溝女方？）冇嘅，當日我哋成班朋友食飯。（如果有朋友在場，相信Baryan唔會咁衝動？）係因為有朋友落咗街攞嘢，咁所以當時剩係我同佢喺屋企，所以佢誤會咗。（當時你有冇同佢解釋？）呢個我唔方便講。（會唔會追究？）呢個我唔講，但我已經方放低咗件事。（有否聯絡Bryan?)大家都冇聯絡。」