簡淑兒提男友麥大力即甜到漏：好多嘢唔需要講佢都會理解

藝人簡淑兒（Jessica）於周四（2日）出席無綫「馬季開鑼」的活動，她接受《香港01》記者訪問時透露自己小時候曾想過做騎師。Jessica早前被踢爆跟麥大力拍拖，二人亦大方認愛，一講起男友吸引她的地方，她就忍不住甜笑回應：「其實佢比較成熟，我同佢相處落，佢好顧及人哋感受，呢樣係我自己好欣賞佢嘅嘢嚟嘅。（會照顧到你？）大家可以相處得開心囉，因為我覺得有時要有個人去明白你，或者有時好多嘢唔需要講出口，佢都會去理解，去體諒嘅時候，你會發覺一齊行落去係開心好多，唔需要嗌交，因為我自己唔係一個鍾意嗌交嘅人，佢亦都唔係。」

選擇高調認愛，Jessica笑言「唔係佢揀」，只是被傳媒影到，她說：「因為我曾經講過，如果係我自己嘅話，未去到結婚嗰一刻，我都係唔會公開嘅，但係如果真係影到嘅話，我又覺得冇必要佢講大話。同埋喺佢嘅角度，佢唔係完完全全一個圈中人，佢會覺得拍拖咪拍拖囉，冇乜嘢㗎。以前嘅我係會覺得唔想講，點解我要將我自己嘅私生活攞出來講呢？但係佢就冇乜所謂。（覺得佢係結婚對象？）太早啦！我哋一齊咗兩、三個月咋嘛。」