香港小姐2021｜謝嘉怡狂跑5公里變Fit爆身形：做呢行個樣一定要靚

謝嘉怡（Lisa）今晚（22日）出席《香港小姐2021》準決賽。回港兩個月的她身材Fit爆，更搣甩臉部贅肉變瓜子臉。她透露在英國食太多煎炸食物，回港隔離期間在酒店每日跑4至5公里兼做深蹲，飲清清淡，故成功瘦身。

不過她表示其實體重「重咗少少，可能多返啲肌肉。」她又認為離理想身形仍有距離，「冇留意減咗幾多，但可以再減多少少，想要馬甲線，但太瘦都唔好睇。」

問是否為拍《愛回家之開心速遞》而努力減磅，她表示：「其實唔係，我返英國真係食咗好多嘢，返嚟肥咗少少，我覺得上鏡唔好睇，你做呢行個樣一定要靚，所以減咗少少。」

近日她以「呂冠君」之名亮相《愛回家》，並透露仍在拍攝劇集，「呂冠君」亦將再次出現。她指平時靠寫英文拼音記對白，又會睇TVB劇集學廣東話，她又不滿自己做戲欠缺情感，平時靠睇美劇學演技。