李家聲演戲有要求 當眾指點新人：我嗰代就用粗口直接鬧嘅！
撰文：郭敏玲
出版：更新：
李家聲做「雷震子」做到出晒名，而佢行事作風都有「雷」一樣，喜歡有嗰句講嗰句。如果記憶力強的網民，或多或少都會記得李家聲曾經當眾「指導」其他演員，而且不分男女，如果眼見對方有甚麼唔對路的地方，李家聲會直斥其非。
最經典的莫過於是2004年拍《學警雄心》，李家聲被指經常寸爆薜凱琪。就好似拍《學》煞科戲時，李家聲眼見薛凱琪接受訪問，中途突入說：「做咩訪問呀？又講你啲歌唱事業呀？」令薛凱琪唯有以笑帶過。另一個被「指點」的演員，就是當年新人郭力行。李家聲眼見對方不懂走位，直接開口喝令對方：「你企係後面做我個影？低能㗎！」當時郭力行資歷尚新，面對前輩指摘，都虛心受教。
被問到對其他演員不留情面地鬧甚至喝令，對於李家聲來說，正常過正常：「舊人帶新人係好事嚟㗎嘛！培育下一代嘛。我係鍾意鬧嘅，我嗰一代就用粗口直接鬧嘅，被人鬧慣㗎啦，而家香港小姐、先生一出嚟都可以做主角，邊識咁多吖！」李家聲在別人眼中雖然是聲大夾惡，但他都是出自內心地為新人好，袋錢入人哋袋。據知有李家聲份的場口，他都會幫手，為監製打點一切。雖然俾人鬧的確很hurt，但李家聲表示遇過肯聽教的新人，例如黃宗澤（Bosco），往日拍《我師傅係黃飛鴻》時，都有提點對方。劇集一出，Bosco都有被觀眾讚過好戲，諗返其實李家聲都功不可沒。問到李家聲有冇遇過新人係比較反叛？他就顯得比較避忌：「咁我就唔講啦！」但他始終覺得，如果唔想俾人鬧，應該要做好本份。