戴祖儀（Joey）今晚（10/7）現身將軍澳電視城出席《明愛暖萬心》直播節目。Joey透露早前連同成班《後生仔傾吓偈》節目主持人出海船P，在拍攝期間馮盈盈不幸發生意外：「其實呢個船P由19年嘅時候已經講，但最終講到21年終於有得去，點知一去就瘋狂見血。就好似盈盈咁佢『指公』受傷，係因為佢喺船度被船邊啲鐵片𠝹到，成塊皮剷起咗，不停流血，我哋即刻幫佢止血消毒，但佢都好勇敢，一滴眼淚都冇流過，反而我見到都覺得好痛，不過，最後佢都要入醫院縫咗六針。」