【阿爺廚房】鼎爺晨早想教煮餸　惜男高層嫌棄：佢唔信我識煮嘢

李家鼎主持的《阿爺廚房》，口碑收視雙雙報捷，鼎爺粗獷外形下，教煮餸時卻相當溫柔，烹調菜色夠貼地，講解詳盡，刀功出眾，為他贏得廚房暖男美譽。但人紅不但是非多，更往往會被抽水，近日有報導指曾主持《吾淑吾食》及《吾湯吾水》的黃淑儀，竟然師承鼎爺，而經過她穿針引線，鼎爺才能夠主持《阿爺廚房》，內容原來全是幻想。

鼎爺接受《香港01》記者訪問，表示根本無教黃淑儀煮餸，「大家可能誤會咗，好多人打嚟問我，其實我只係教過佢打功夫之嘛，都無教煮嘢。」不過鼎爺表示有看過黃淑儀的節目，大讚對方「佢成日鑽研菜式，梗有天分啦。(跟你比邊個廚藝好啲？)佢叻過我呀！」鼎爺言語間相當謙虛，而他跟黃淑儀份屬好友，正好以餸會友，互相切磋一番。

早前的報導更指黃淑儀知悉鼎爺廚藝高超，所以專誠推薦他拍攝《阿爺廚房》，鼎爺表示淑儀姐確實有推薦他拍煮食節目，但卻是多年前的事，而且鼎爺更慘被對方拒絕，鼎爺憶述當年情況，「之前係推薦過我，但俾人reject咗啦，好多年前嘅事啦，邊個就唔記得啦。(究竟誰人如此有眼無珠？)佢都退咗休啦，男人嚟嘅，可能佢唔信我識煮嘢啦。今次係曾勵珍小姐搵我嘅。」

《阿爺廚房》進入尾聲，網民紛紛支持鼎爺開拍第二輯，而鼎爺表示都想添食，但至今仍未有消息，「我哋好被動㗎嘛，但我唔會扭計加價嘅，依家都係等通知。」網民對鼎爺舉腳支持，但他拍檔譚玉瑛卻被網民狠評，希望鼎爺能夠換上新拍檔。鼎爺囝囝李永豪正在無綫拍劇，不如提攜一下囝囝，父子檔上陣主持節目，鼎爺聽畢馬上表態反對，「千祈唔好，父子兵實俾人話。」鼎爺說誰人想學他的廚藝，他也無任歡迎，不如將一身廚藝傳授給囝囝，才一起主持節目，咪皆大歡喜囉。