【八時入席】時生楊瑞麟為信仰拒做風水騷 慘變老臨：肯定冇後悔
《愛．回家之八時入席》到下年1月6日就全劇播完，邦主(黎耀祥飾)、十仔(馬貫東飾)、Elsa(簡淑兒飾)等，令人難忘，但最有驚喜的，估你唔到一定係時生(楊瑞麟飾)，在劇中是電視台總裁相當滑頭，機關算盡，最近劇情還說他為了電視台不賣盤，而自動降職到物資供應部主管，但想不到現實中的時生楊瑞麟亦曾被無綫降職，由金牌司儀變為臨時演員，93年楊瑞麟開始任《都市閒情》主持，原本年年爆騷，但在97年因基督徒身份婉拒主持風水節目，結果被停職，之後更要當閒角還騷，楊瑞麟自言性格影響命運，他說:「下年我會攞30年金牌，我個人企圖心唔係咁重，物質生活對我嚟講夠就得，望返轉頭，我好肯定話你聽我冇後悔。」
【八時入席】時生楊瑞麟為信仰拒做風水騷 慘變老臨：肯定冇後悔
楊瑞麟和無綫的關係，分分鐘精彩過《八時入席》， 1987年當時25歲的楊瑞麟在加拿大多倫多大學讀完土木工程回來，在一間工廠當Project Manager，當年楊太看到無綫舉辦《全能司儀大賽》幫他報名，黃子華也參加這個比賽，最後楊瑞麟成為冠軍，結果楊瑞麟起步不錯。
93年開始主持《都市閒情》，基本上年年爆騷，直至97年楊瑞麟因為是虔誠基督徒，拒絕主持風水環節，結果他不獲續約，連司儀工作亦即時停止，最慘是要還騷給公司，他說：「當時有人覺得如果有啲同事，個個唔鍾意做就唔做，咁公司咪好難運作？但我哋主持嚟講，其實好易攪掂，譬如有人怕狗，咁咪同個唔驚嘅調囉，好易就解決到，我係基督徒，我唔想接觸風水，而且風水節目最多做兩日？兩日都多，一星期一日就夠，咁係咪好難調呢？但當時的確鬧出一啲事件，我係被抽起咗，冇得再做《都市閒情》主持。發生呢件事前，我亦同過公司講，唔想拍劇，因為自己出面有工作又有主持，冇乜時間，公司同我講如果唔夠騷，你要還騷俾公司！我仲不以為意，我哋做司儀點會唔夠騷？但之後停咗我主持工作，講笑咁話，我可能係第一個還騷嘅藝人。」
因為要還騷，楊瑞麟要在劇組拍劇，幾乎全部茄哩啡角色，他說：「當時久唔久就收到劇集組一個電話，做啲俾臨時演員好少少嘅角色，我亦唔介意，我仲好奇怪，我完咗約喎，仲有人打嚟？原來under騷合約就自動更新，結果還騷還咗兩年。」由爆騷主持變成還騷茄哩啡，楊瑞麟因為在外有生意，所以失落感並不大，他說：「因為出面有其他工作，所以就…當然有唔開心，但係好快就冇難受感覺，但還完騷無綫再簽返我，我都好奇怪，因為喺佢哋眼中我可能係幾唔聽話嘅人，但又真係簽咗！」
下年入行29年，楊瑞麟先等到「時生」這個入屋角色，但到現在楊瑞麟都不明白為何突然有這個機會，有人覺得時生是他的事業另一高峰，但他沒有這種想法，他說：「30年來，唔覺得自己有“高”過。和無綫的關係平而未穩，可能我一直都係靜靜的工作，唔活躍人際關係，對管理層又唔熟，偶然撞到亦只係禮貌式打個招呼，所以只可話係關係平靜而不敢講安穩。對於好多人嚟講等咗30年先有機會係遲，但我好接受每一個人有不同嘅人生，有人可能一生都冇一個機會，亦有啲人好早有一個機會，視乎你同邊個比較，我覺得自己有呢個機會，應該要好感恩。」
同樣做了接近30年的麥包和陳國邦，最近選擇離開，楊瑞麟稱在無綫要清楚自己的代價和選擇，他說：每個人選擇都有代價，有啲堅持，之後成功，有啲堅持去到尾都冇呢個機會，要因應自己嘅經濟狀況嚟調教心態。如果你屋企有好大負擔，咁你可能要迫住轉行，唔係個個堅持就得，好似我咁就係一個例子，堅持到現在都唔係有咩機會，我自己表現亦係一般啦，所以只可能喺工作上自己揾樂趣。所以就算新人問我，我都係叫佢做好自己先，唔好太多空想。」
《八時入席》和《巾幗3》楊瑞麟亦有不少戲分，但他亦明白不保証套套都有戲做，亦有可能做回普通角色，他說:「怕？唔怕啦，我只係希望有多啲角色，冇，都接受現實啦，做返以前嘅角色，我可以話唔享受啦。但都會做好。」呢啲就係專業囉！