好聲好戲｜楊潮凱孫慧雪重現《天地豪情》經典一幕　失準激動爆喊

無綫節目《好聲好戲》昨晚播出的一集，楊潮凱在最後一回合的拍檔聲演環節，找來好朋友孫慧雪，合作演繹經典劇集《天地豪情》結局篇中，張家輝與蔡少芬的激情「攤牌」戲份，楊潮凱更配音配到入晒戲，完全投入角色，演得聲淚俱下，可是卻因為過度肉緊的演繹而影響了發揮。

其實兩人的表現已經好好，獲得了6盞綠燈1盞紅燈的大比數合格成績，可是楊潮凱卻自覺失準，更不禁即場激動爆喊。他坦言不滿意自己這次的表現，感觸地表示：「因為排練咗好耐，花咗好多時間去諗應該點做，臨上台之前諗住叫自己唔好咁緊張，但係上到台唔知點解，一做嘅時候就緊張升得好緊要，所以你哋頭先講話我over係啱嘅，真係，我想㩒返落去，但係我知道我一㩒返落去，有啲位就去唔到（發揮唔到），有啲位已經做得差咗，嗰一刻我有少少覺得，點解做唔到自己想要求嗰個表現呢？」