阿一布偉傑求婚成功　為養家離巢北上：想給老婆更好生活

恭喜，恭喜，阿一布偉傑跟拍拖3年的化妝師女友Celia，終於拉埋天窗，而阿一更在Facebook專頁公布喜訊，上載一張女友戴上婚戒的相片外，並留言「我今年收到份大禮物，She said YES」，各方好友知悉後，紛紛向阿一送上祝福，更值得高興是阿一會有更好發展，明年約滿無綫後，他選擇不續約，結束11年賓主關係。

阿一在美國出生，外表上由頭到腳也是外國人樣，但他在大學時卻主修中國文學及亞洲研究，不但講得一口流利廣東話、普通話、英語及柬埔寨語，而且睇中文劇本也完全無難度，1999年來港，並開始了演藝生涯，先天優勢讓他拍劇無往而不利，至2006年加入無綫後即成為「御用老外」，逢是外國人的角色，包括外籍警司、恐怖份子、神父，也例牌由他上陣，而最為人熟悉的是2007年處境劇《同事三分親》的韋一，其後大家也愛稱他為阿一，反而很少人知道他的名字是布偉傑。

能夠跟深愛的人組織家庭，開心之餘亦責任重大，阿一在籌備婚禮的時間，決定約滿後離巢，是因為成家立室而要作出改變嗎？阿一接受《香港01》記者訪問，表示其實是兩個計劃，沒有必然關係，「決定離開係因為已經做咗咁多年，想有進步，做得更好，而離開後會多啲返內地工作，拍網劇及電影。」但他不違言想賺多點錢，給未來太太更好的生活，「TVB收入無可能養家啦，只係為咗賺知名度，依家主要收入來源係做司儀，而且內地市場大，機會自然多啲。」

阿一既然是「御用老外」，機會何解會愈來愈少，莫非是余詠珊入主後，新人事新作風，機會俾晒有線幫？「呢啲嘢我唔知，都唔識答你。不過我入行已經預咗唔會做到主角，最多都係做到個好配角。但自從《收規華》之後，都無一個角色有得發揮，勉強要講《超能老豆》都OK嘅。」阿一清楚圈中的遊戲規則，他沒有怨天怨地，責怪任何人，反而多謝珍姐(曾勵珍)給他機會，而且在無綫亦攞到不少演出經驗。

來港十多年，阿一已是香港永久居民，連未來太太也是香港人，他說已不想返美國住，至於北望神州，也只是跟其他港星一樣純粹掘金，他表示：「內地嘅演員都係講普通話多，識得講廣東話嘅少，而講廣東話嘅外國人就更少，我覺得呢個係我嘅優勢。不過無論喺內地搵到幾多錢都好，我永遠都係一個香港人。」阿一現正創作他的第二齣音樂劇，講一個失去信仰的人如何去搵番信仰，劇中更會用上Beyond的歌。鍾意Beyond的阿一，跟7、80後的你和我其實並無不同。