【平安夜．有片】偽毒坤哥聖誕冇女陪 鷲哥鬧醒毒男：使驚冇女?
「Single Bell！Single Bell！Single all the way！」聖誕節又殺到埋身，一眾單身人士非常頭痕。以前有MSN、ICQ就話可以扮offline當出街啫，但而家又點製造自己有「不在家證據」呢？Come On James，成熟一點好不好！無得出街真係好慘咩？香港01就話你知：只得你無街去？You Are Not Alone！娛樂圈雖然多姿多采，但咪又係有人都係無街去！
鑽石馬國明
就好似馬明，他已晉升為著名的「鑽石王老五」，今年聖誕會去邊？馬明就透露會到外地登台搵外快，對於自己單身第N年，似乎都非常豁達喎！「我咁大個仔，都試過好多年無拖拍，但我又覺得無乜所謂，做人要活在當下，我有朋友有拖拍，佢就嫌好煩；到無拖拍時，又嫌好寂寞，咁你有無拖拍都唔開心。」馬明認為Lonely Christmas咪Lonely Christmas囉！「咁咪享受一下個自由囉，無拖拍有無拖拍嘅好處㗎，周圍望下女仔又無人話你，都係一個自由嚟嘅！」
偽毒吳業坤
安慰唔到自己？出名偽毒的吳業坤坤哥都話要自己過聖誕：「聽到『偽毒』呢個名，邊有女性朋友肯埋身？我都安排節目畀自己，一個人去睇賴慰玲嘅舞台劇。」坤哥講到自己過聖誕的次數，多到猶如天上的繁星，大多數自己打住Online度佳節：「咁樣都幾型呀，都唔會特登扮出街。」「偽毒」坤哥咁講，信不信由你啦！
鐵漢李家鼎
仲未夠的話，不妨聽下充滿歷練的鼎爺點講？「我40幾年來，聖誕都要開住工過，但有工開咪好囉！」咁有得過想點過？「最想同班傾得埋嘅朋友、細路仔、孫仔開開心心咁過囉。」係囉，唔好放到無人陪咁大啦，就算自己一個人，仲有家人親人嘛！
鷲哥吳岱融
係都覺得無人陪唔安樂啊嘛？等鷲哥吳岱融點醒你：「做咩？擔心聖誕節無人陪你過呀？好心你啦，無咪無囉！有啲性格啦，有咩所謂啫？」係囉係囉，鷲哥就淡定啦，聽完之後，係咪覺得好治癒？其實自己過聖誕有咩好怕喎？