徐子珊息影近兩年終有新照曝光　傳因疫情關係暫緩移居歐洲

41歲徐子珊2019年宣佈息影退出娛樂圈，移居歐洲進修同生活，早前傳出佢放售貝沙灣豪宅勁賺近700萬。但原來佢因為疫情關係一直未成行，相隔多時再有近照曝光，現身為關禮傑太太慶祝生日。

2019年徐子珊喺香港大學完成心理學碩士課程，與王祖藍公司約滿後決定息影，而且非常決絕，將IG Facebook帳戶注銷，亦無再出席公開活動。2010年佢以大約1,080萬元購入貝沙灣單位，傳出於2019年開始放盤，曾叫價2,600萬元，最終以1,760萬元成交，但有指佢眼見樓市暢旺最終未有放售。

徐子珊低調到猶如消失人口，微博喺19年6月後亦未有再更新，呢日佢現身為關禮傑太太梁安娜（Anna）慶祝生日，終於有近照曝光。見到佢息影後依然keep得好fit，面尖尖留住長直髮，笑意盈盈，精神相當唔錯，不過同佢出娛樂圈前嘅照片樣貌好似有些少出入。