【阿爺廚房】杜汶澤高呼愛上鼎爺有料到　李家鼎：大把人叻過我啦

李家鼎跟譚玉瑛合作的飲食烹飪節目《阿爺廚房》，顧名思義，由鼎爺大顯廚藝，節目播出之後，網民即大讚鼎爺刀功好，烹調的菜式夠地道，想不到鼎爺功夫了得外，廚藝亦相當耍家。鼎爺近日更多了一位明星粉絲杜汶澤，他在Facebook專頁留言，表示跟老婆田蕊妮放假睇TVB，即大讚鼎爺的節目，話好耐無睇過對煮嘢食有passion的廚師做節目，還說愛上鼎爺。

平日牙擦擦的阿澤，對鼎爺甘拜下風，並指難得見到對方柔情一面，跟平時講李小龍的樣子截然不同，鼎爺接受《香港01》記者訪問，他笑言「多謝，多謝佢先。咁梗係唔同啦，做節目時係斯文教授，另一個係powerful。」阿澤又讚鼎爺「睇刀功、拋鑊、選料，煮嘅過程每一句都係教材，好detail，自己廚房有自己嘅風格」，但鼎爺教煮餸時又詳盡又地道，原來並非跟稿讀，而是隨心而發，「見到材料就得，唔使預先度定稿嘅，而寫稿嘅亦好尊重我，由得我講。」

鼎爺表示雖然未有授徒，但他卻樂於傳授烹調技巧，「有人問到一定教，而且言無不盡。」鼎爺曾表示入廚刀功，是爸爸叫他學的，但鼎爺卻未有傳授兩位囝囝廚藝，「佢哋冇乜興趣喎。」最後鼎爺謙虛表示不怕自己的功夫失傳，「無咩話失唔失傳嘅，大把人叻過我啦。」看來鼎爺還是快點出番本烹飪書，將自己廚藝發揚光大。