吳若希孕後發福首亮相　懶理腰痛照穿高跟鞋

11月宣布懷孕四個月的吳若希（Jinny），今日在懷孕後首度公開出席蛋糕品牌活動。吳若希雖然身穿紅色鬆身衫，但臉形及胸口都有所升級，漸見孕味。不過吳若希著住3吋高跟鞋，懶理腰痠背痛，簡直愛靚唔愛命！

Jinny今次蒲頭，原來履行返懷孕前所答應出席活動承諾，她預告聖誕節會再次出動，之後都會出席機構活動。陀住個B，吳若希話自己日常有啲無聊，「基本上乜嘢都唔洗做，都會有人煮嘢食，所以而家發福，我嘅24吋腰無咗啦。」她更講到有咗BB記性比以前差：「去到邊度都總會漏低嘢，好似好蠢咁。」

問到BB想係邊度出世，吳若希就話未有計劃，仲話怕3年抱兩，「屋企而家有好多小朋友，Alex（男友）啦、我細佬仲有肚入面個BB，一個人已經要湊3個，都搞唔掂啦。（介唔介意做未婚媽媽？）都唔會有壓力嘅，新一代嘅女性都好獨立，我自己都係工作型女性，之後落嚟都會努力做個歌手媽媽。」Jinny表示生完BB先會結婚，問到BB係意外定計劃，佢就答得好玄：「我就迷信嘅，命理上我婚姻就比較唔正常，唔正常都有好多種行法㗎嘛，我都係順應個天啦。」