邱芷微結婚｜利穎怡返內地拍網劇未能做姊妹感可惜：今日我係請假

利穎怡和李君妍今晚（28/2）現身尖沙咀出席好友「賈名媛」邱芷微婚宴。李君妍接受《香港01》訪問時表示：「其實我同佢老公陳志忠熟啲，因為佢係我哋公司嘅同事嚟，之前有關網絡上嘅嘢我都搵佢搞，之後就因為《功夫新星》再認識，原來佢詠春係好勁，記得之前都有去公司借兵器。嗰陣時都有跟佢學過吓嘢，未算係入室弟子，因為未正式同佢拜師學藝。」

利穎怡和李君妍今晚現身尖沙咀出席好友「賈名媛」邱芷微婚宴。（葉志明攝）

利穎怡接著說：「我反而係認識邱芷微先，因為我同佢係一齊演舞台劇嘅時候認識，記得大家仲係演同一個角色，大家會喺唔同嘅日子去演出。本身邱芷微係叫我去做姊妹，但我因為呢段時間要拍嘢，變咗我應承唔到，今日我都係請假，聽日一早我要返內地拍網劇，咁所以做唔到姊妹我都覺得好可惜。」