【八時入席】陳國邦再離巢 即閃無留戀：完成咗一個工作囉
撰文：林通賢
出版：更新：
陳國邦上年10月離開無綫，當時在社交網絡上寫下一封《給無綫電視的公開信》，那句「我不想看見自己慢慢的變作一潭死水，變黑發臭....」成為金句，但兩個月後，在無綫副總經理杜之克和毛舜筠力邀下回巢，拍攝處境劇《愛．回家之八時入席》。
今日《八時入席》煞科宴，陳國邦在活動上公開表示今日last day，在記者會上亦有答謝黎耀祥、湯盈盈、毛舜筠，之後卻極速離開沒有接受傳媒訪問。《香港01》致電陳國邦，他以WhatsApp回覆：「離開又冇咩特別感覺，咪完成咗一個工作囉，我哋做演員就係完成咗一個劇，咁咪開始另一個工作囉，只不過工作未必係無綫電視啫，但唔知㗎，可能又好似今次咁樣，如果佢哋再有工作適合我，又會返去無綫。」
上次國邦離開，就寫了一封公開信，表示不想變作一漂死水，問佢今次離開又有冇「死水」感覺，國邦今次則沒有這麼感性，他說：「我不如咁樣形容啦，其實自從我寫咗嗰封公開信，離開之後，我已經係自由身嘅藝術工作者，今次我返去簽呢份約，都係完成咗我而家嘅工作，就好似我上星期同一個舞台劇團完成咗工作一樣，我又同浸會完成咗一個教育嘅合約，其實我以自由藝術工作者，繼續我嘅事業。」
但眾所周知，自由身，非親生仔在TVB有突破性發展談何容易，不過國邦另有一番體會，他說：「我已在無綫工作達20年了，又如何呢？有同事比我年資更長，又如何呢？又有同事短短日子便能當上主角，又如何呢？明白到人生各有際遇，認清自己，行自己想行的路吧。」2個字，心淡囉！