山河令｜豆瓣評分屢創新高　香港老戲骨梁家仁驚喜客串

內地劇集《山河令》上月底開播，雖然屬於低成本製作，但估唔到喺豆瓣評分有8.6之高，勝過《陳情令》嘅7.7分，成為目前「雙男主陸劇」最高評價的一部，而兩位小鮮肉男主角張哲瀚、龔俊人氣更直逼一線藝人。

《山河令》故事內容圍繞2位男主角浪迹天涯，後捲入江湖鬥爭，兩位男主角不時口花花亙撩，加埋肢體接觸，為觀眾帶來不少驚喜。不過，更驚喜嘅係劇中原來有兩位久未在香港露面嘅老戲骨：梁家仁同徐少強。兩位在首集已經出場，徐少強飾演畢長風，因要脫離組織「天窗」，而被執行七竅三秋釘嘅懲罰；至於梁家仁所飾演嘅無名侍衛，雖然加埋對白唔夠十句，但形神俱備，同當年喺《天龍八部》扮演嘅喬峰一樣咁大俠。

72歲嘅梁家仁，早年參演不少TVB劇集，當中包括《孖仔孖心肝》、《卡拉屋企》、《闔府統請》，而電影方面，喺《唐伯虎點秋香》中對住周星馳嘅一句「你就係華府嘅低等下人，9527係你終身代號！」更係令人記憶猶新。唯近年梁家仁轉戰內地，加上大多時間弄孫為樂，所以甚少在香港看到他的演出。

點擊下圖睇老戲骨發揮

至於70年代演過不少大俠角色嘅徐少強，自04年前再娶比他年輕30年嘅內地舞蹈員後，事業重心已轉移內地，與雪梨所有嘅一對仔女只係靠電話維繫感情。早年曾有消息指徐少強背住太太搭上內地艷星羅雲琦，但事後徐少強即跟對方劃清界線。徐少強雖已年屆70，但劇中飾演畢長風嘅佢，英氣大足，大俠味不減當年。