【蔡楓華開騷】無懼與張學友撞期 狂收利是自認命苦
52歲的蔡楓華今年5月先喺文化中心開騷，半年後，又有騷開啦，而且重要係一連兩晚在荃灣大會堂，係威！不過可能係因為撞正歌神張學友開騷，所以入座率大概只得5成左右。但蔡楓華一點都唔介意，重宣告自己明年3月會唱到去澳洲，好威威！
雖然這個《蔡楓華燃情心曲演唱會》沒有什麼舞台設計可言，但有bass、keyboard、伴唱、亦有嘉賓甄穎珊……設備都叫好齊全。至於主角蔡楓華，亦準備了兩套衫以及由頭帶到落尾的黑超。踏正8時05分，蔡楓華一現身，先以《生命動力》warm up，接著一首《也許》，手指尾輕輕一動，觀眾即時尖叫又拍掌。「你哋今晚無去到紅館，ok!今晚送啲好歌俾大家聽。」唱罷《無奈》、《愛的根源》之後，蔡楓華就話「接下來要唱的歌有很大的回憶，因為從未在演唱會上唱，唯一一次在馬場，代表香港電台唱，那時有位朋友叫張國榮，當時個個都叫佢做張國榮，唔係叫哥哥，他那時在後台說很騰雞，因為出去表演時飛了一頂帽出去，但觀眾把帽丟回給他……」講完，蔡楓華唱關正傑的《殘夢》，到底成件事同張國榮有什麼關係呢？相信只有蔡楓華先知道了。
話自己命苦
開場時，蔡楓華話要送啲好歌俾大家，所以整個個唱，除了自己的首本名曲之外，他亦選唱了鄭少秋的《書劍恩仇錄》、《誓要入刀山》、羅文的《魔劍俠情》，而當他唱張國榮的《戀愛交叉》時，都有郁身郁勢，而看到觀眾反應極好，他之後亦忍唔住清唱了一小段《Monica》。「有啲人話蔡楓華一生真係好苦，我可以話俾你聽，我真係好苦，我曾經上過天，亦曾經落過地，但我仍然企喺度，你哋對我真係好好，因為我知道今晚張學友喺紅館開演唱會，以下呢首歌，我成日用來振作自己，只要你唔放棄，就一定有機會。」蔡楓華咁用心，觀眾即時拍爛手掌，之後佢就唱出陳百強的《喝采》。
狂收粉絲利是
蔡楓華整晚不停話粉絲對他好好，到底有幾好？其實一開場無耐，已經有粉絲拿著利市（係利市，唔係花）走近台邊，但蔡楓華一直都未有理會兼且話：「大家心領。」不過，或者係因為粉絲太太太熱情，所以最終蔡楓華都接受了她們的心意，而且收獲都幾豐富。
當甄穎珊出場時，兩人雖然未有太多交集（似係唔識），不過蔡楓華都有話：「前幾日你簽了TVB，希望你可以心想事成拍劇又唱歌，唔好好似我咁就得啦，一定要大紅大紫。」全晚唱近28首歌，蔡楓華最後送上名曲《倩影》以及《絕對空虛》，不過唱《絕》時就因為入唔到beat，要重唱，粉絲當然即時送上掌聲鼓勵。