《使徒行者2》內地網上獨播　陳豪演黑幫大佬：做好人太耐

無綫劇集《使徒行者》收得，開續集是意料中事，今日《使徒行者2》舉行記者會，沒有林峯、佘詩曼，只剩下苗喬偉、許紹雄，新加入的有陳豪、周柏豪、連詩雅、袁偉豪、麥明詩等。當中網友最愛的歡喜哥（許紹雄）表示，這個故事是前傳，發生在2010年，「講我未做大佬前、仲做緊差佬嘅故事，陳煒做我老婆，但被人殺咗，我要報仇。（同電影版有冇關係？）有呀，（但電影版你個老婆死咗喎？）係呀，我有兩個老婆嘛，其實你地唔應該黐埋一齊睇嘅、電影還電影。」

而新加入的陳豪將會做反派，他說：「做咗好人太耐喇，除咗電影外都未再試過做壞人，今次好好玩，我做黑幫大佬，但唔知同邊個有對手戲最多，因為劇入面我係咁殺人，我驚殺到無對手。」陳豪突破電視框框做奸，不過現播放的《來自喵喵星的妳》收視就不似預期，連陳豪都感到失望，他說：「有少少失望啦，不過都可以了解觀眾嘅口味，下次再調教。我好鍾意做笑片，我想帶番多啲歡樂畀人。」

不過，《使徒行者2》首先會在內地騰訊視頻獨家播放，咁香港呢？TVB未有正面交待，不過從部份演員口中得知，《使徒行者2》應該是內地播先。而到時是不是黃金時段播呢？冇人知。而故事同第一集和電影有少少關係，但歡喜哥又要大家分開來看，即係……大家收看時不要想太多吧。