42歲原子鏸宣布懷孕　笑稱鄭佩佩唔恨抱孫：最遺憾媽咪喺美國

鄭佩佩女兒原子鏸（Marsha）去年下嫁摩洛哥型男Mehdi El Ajimi，呢日傳來好消息，42歲嘅Marsha已經懷孕14周啦﹗佢接受訪問時表示：「BB係男仔嚟，自己其實仔女都無所謂，有咗已經好開心，預產期大約3月，應該喺我生日附近。同老公知道懷孕後無同任何人講，希望做晒檢查知BB健康先同大家講。」

Marsha表示懷孕初期有少許不適及疲累：「朝早有啲孕吐反應，聞到肉味會唔舒服。個人比較攰同好想好想食嘢，但食完又會唔舒服。媽咪對我地生唔生BB都無所謂，無話特別興奮，但爸爸就恨抱孫好耐，非常開心。最遺憾係媽咪喺美國，依家唔喺香港，無辦法陪我經歷懷孕同生BB呢段時間，要等我生完BB先可以去美國見佢。」Marsha指自己會繼續教瑜珈，不過會等疫情確診個案再穩定啲先再開始教班。