黃美棋為自己送上31歲生日大禮：我成為一個香水調配師啦﹗

圈中唔少藝人都相當好學，為興趣花時間去重拾書本，考取各式各樣專業資格。8月25日就31歲嘅黃美棋，為自己送上大禮：「我成為咗一個香水調配師啦﹗」

美棋除咗喺TVB主持節目及拍劇以外，不時同男友鍾健威拍片曬恩愛，又同朋友投資開餐廳，原來佢仲暗地裡去修讀課程。美棋喺IG留言話：「正式同大家宣布！我又多個成就解鎖啦﹗我成為咗一個香水調配師啦﹗呢個係今年生日送畀自己嘅其中一份禮物。除咗證書，仲做咗支全世界唯一無二嘅香水添﹗大家有關於香水嘅問題，可以同我一齊研究研究～ 其實我一直都好鍾意儲香水，又咁啱認識到原來香港有間香水學校，所以就開始咗香水鑑賞及調香員證書！嚟緊我會讀埋專業深造，再發掘更多香水嘅樂趣，話唔定第時會有自己嘅香水品牌㗎。」