AKA趙慧珊下廚有板有眼自認賢淑　周中：煮嘢食最緊要熟就得！

綜藝節目通常都係遊戲旅遊居多，疫情下都難以拍攝，變相好多煮食節目湧現，除咗引起討論嘅《女人必學100道菜》之外，本身屬於「實力派」嘅周中師傅，最近就化身YouTuber，同嚴崇天主持《周中廚房》，日前搵嚟Aka趙慧珊做嘉賓，師傅講到明：「賢唔賢淑唔緊要，煮嘢食最緊要係煮熟，不過佢OK嘅，又靚又後生！」

主持嚴崇天同Aka相識10年，份屬好友，不過阿天承認，一直唔知對方廚藝如何。節目中Aka親手整香橙魚柳同桃膠雪梨桂花羹，周中師傅都大讚有板有眼，只係切魚雞手鴨腳，急凍都可以切到新鮮魚咁散晒，不過靚女搭夠整體都滿意。有靚女做嘉賓周中師傅笑到見牙唔見眼，仲跟Aka扮可愛頭貼頭影相，相當有童真呀！