鄭欣宜生日跌落急流驚到喊　何佩瑜︰我鍾意刺激

動作喜劇《辣警霸王花》下月13號在港上映，6位新一代女霸王岑麗香（香香）、何佩瑜（Jeana）、鄭欣宜（Joyce）、崔碧珈、何佩珉及李元玲於片中打到七彩，又要追賊、槍戰等，當中最危險是一眾女演員在馬來西亞拍攝跌落急流的鏡頭，全部親身上陣，拼搏精神抵讚。

片中講述這6朵博派之花與另一組狂派霸王花進行野外定向，中途Joyce不慎跌落急流幾乎浸死，其他隊友見狀隨即跳落河搶救。雖則做足準備功夫及安全措施，但急流危機四伏，幾位女演員對跳河非常恐慌，不過最後仍堅持親自拍攝，就連嬌滴滴的香香亦咬實牙關亡命一跳，之後她們還要在急流拍攝水中掙扎，全部變了落湯雞，Joyce更驚到喊。

Joyce說：「我記得那日還要是我生日正日，臨跳時我驚到哭了出來，我未結婚又未生仔，好多嘢未做，唔想死呀！其實導演同監製好好，有預備替身給我，怎知個替身好細粒，我高對方半個頭，我就覺得冇理由咁樣去呃人，惟有自己跳。因為呢啲鏡頭係一take，我記得跳的時候，我就同自己講，死都要擰轉身，等個臉口對住camera，咁先證明到真是我跳。」

除了急流戲外，Jeana、Joyce、香香等一齊在森林探險玩skytrex adventure（空中跋涉），她們要爬樹攀石又穿越空中繩網及空中吊索，總括一個字：驚。唯獨Jeana例外，她說：「我鍾意刺激，現在還想挑戰跳傘，所以爬高或者落水對我是冇問題。」