【今日疫情】菲傭姐姐無法返港點算好？　專業人士：協議放無薪期

菲律賓本月初宣布禁止菲律賓民眾前往中國，當中包括香港、澳門，令大量菲傭無法來港，唔少香港僱主都即時陷入崩潰狀態。最新一集《今日疫情》就住呢個問題，請來香港僱傭同業協會代表劉麗斯以及感染及傳染病專科醫生曾祈殷，同大家講解下僱主喺非常時期要留意嘅事項。

劉麗斯指出在港工作嘅工人姐姐，未必會有時間成日留意防疫資訊，就算係使用手機，多數都係用嚟同屋企人溝通，所以僱主最好要密切咁同姐姐溝通，好讓對方知道更多防疫資訊，最好亦都要教工人姐姐如何正確地使用以及處理口罩。提到姐姐放假問題，劉麗斯表示：「法例規定姐姐一定要放假，但唔一定要出外，亦有姐姐會擔心放假留喺屋企要做嘢，身為僱主可以同姐姐溝通，如果佢放假而又願意幫手，可以計返錢俾佢又或者係累積假期。」提到有在職姐姐，受禁令影響而返唔到香港，劉麗斯表示：「雙方可以協意放無薪假期，因為唔知禁令去到幾時。」