【馬蹄露遇襲】因政見起嫌隙　侄仔馬米高：屋企人對我來講好重要

近月來因為逃犯條例掀起嘅連串風波，令唔少家庭因為政見問題變得對立。馬蹄露一向立場鮮明支持警方執法，10月6日喺旺角同示威者起衝突終告受傷。佢同侄仔馬米高嘅關係亦疑似因為政見不合生變。

馬蹄露同YOUTUBER侄仔馬米高一向感情要好，不時亮相對方嘅網上節目，馬米高亦經常陪姑姐登台客串助手兼保鏢。6月初剛提出逃犯條例時，馬蹄露曾於IG貼出一張同侄仔小時候嘅合照，寫上︰「喂！细路，我係你姑姐嚟㗎﹗」疑似已經起爭拗關係不在。至本月初馬蹄露在旺角示威區，因用手機拍攝而與示威者爆發口角及肢體衝突，最終疑似被「私了」，血流披面受傷，馬米高對此一直都未有回應。

到10月16日貼出同姑姐合照留言話：「好多謝大家嘅問候，一切在心中。同屋企人意見分歧係一件正常不過嘅事。無論如何，屋企人有事我都會喺佢哋身邊，好似佢哋會無條件照顧我一樣，以前係咁，宜家都係。最近嘅事情，我接收到好多唔同嘅聲音同資訊，當刻我有好多好多嘢想講、想回應，但我更加覺得係而家社會咁亂嘅情況之下，我更加需要冷靜，靜落嚟等自己去沈澱一下。到咗呢一刻，我只係想講：屋企人對我來講好重要。For me, family comes first. It always did and it always will. 」