蔡少芬幫囡囡古法剝牙　拍埋短片分享：那有小孩自己要求拔牙？

「講嘢最緊要有牙力，睇牙就係要揀有實力」今時今日大家牙痛，當然係上網睇下附近邊度有牙醫。正懷有第三胎待產中嘅蔡少芬，除咗同家人朋友見面聚會輕鬆下，唔少得湊2個囡囡，呢日仲分享佢幫信兒剝牙嘅片段。

蔡少芬（ADA）同張晉已經育有8歲大女楚兒及6歲二女信兒，最近信兒踏入換牙期，正常小朋友最怕就係見牙醫，唔知係咪因為咁，信兒居然向媽媽求救。Ada呢日喺微博上載短片留言話：「那有一個小孩自己要求拔牙呢？」

見到片段中Ada手執一條線，信兒坐喺旁邊既緊張又期待，爸爸張晉揸機影到歷史性一刻。Ada將線套到要剝嘅牙上，一邊話唔夠力分散信兒注意，下一刻已經用線將乳齒剝出嚟，然後笑住執返隻牙再叫囡囡咬住紙巾，古法剝牙過程快狠準，最後齊齊向鏡頭舉V，網友笑言童年回憶返晒嚟，讚媽媽慳咗幾百蚊睇牙錢呀。