【不義之戰】首次拍攝動作電影周身傷　鄧洢玲：兩隻腳大髀瘀曬

鄧洢玲（阿旦）昨晚（24/9）身穿性感紅色吊帶裙現身銅鑼灣，出席電影《不義之戰》首映禮。阿旦透露首次拍攝動作片心情興奮：「我哋拍之前用咗三個月時間，去學拳腳訓練，又練槍械訓練，劇組更特意安排我哋到Wargame場體驗，因為之前未試過拍戲開槍，到我拍嘅時候我冇帶耳罩，一開槍嗰下聲音好震撼，嗰一下自己都估唔到咁勁。」

阿旦透露在拍攝對打場口時搞到周身傷：「因為自己係初哥，導演唔想我打到好似花拳秀腳嘅效果，叫我出盡力打落去對手度，要求我拳拳到肉，希望拍一兩個鏡頭就可以完成，咁所以好記得有一個鏡頭係我飛身用鉸剪腳，夾住對方個頭嗰場戲，足足拍咗十幾次，返到屋企之後發現兩隻腳大髀瘀晒。」