【街坊財爺】 黎諾懿每晚不設防造人　公開生仔秘方：食蠔會生仔

黎諾懿今日（6/9）現身將軍澳電視城出席無綫劇集《街坊財爺》宣傳造勢活動。劇集至今已播出第5集，諾懿笑指每晚強迫老婆一齊睇，不過老婆邊睇邊多意見：「因為最近我哋睇咗一套韓劇《德魯納酒店》，佢睇完人哋嘅製作之後，話人哋拍出嚟嘅嘢好靚，我同佢講人哋所有嘢都係錢堆砌出嚟㗎，其實佢都畀咗好多意見我，不過我依舊回應佢：『哦，哦，哦！』」

提到2歲半愛兒小春雞（黎峰睿）日漸成長，懿諾直言每晚不設防造人：「我點都會生多個細佬妹畀佢，因為將來我都有機會唔喺度，希望將來佢都有個親人喺佢身邊，佢唔會咁孤單，咁所以我同太太無論點都好，都會生個小朋友陪住佢，而我自己嘅心願想生個女。」（食蠔補身？）諾懿直言：「千其唔好食蠔，會生仔，之前我有經驗，唔好做𠴱啲嘢呀！其實我哋啲都市人體質偏向酸性，除非你係好健康嘅人先係鹼性，所以我哋捱更抵夜嘅人，身體一定係酸性，所以我係唔會補嘅，嗰陣時生峰峰之前我係補咗，咁所以今次我乜都唔補。」