【網絡騙案】高海寧坐電單車「辣」燶美腳：Hold多兩秒連皮都冇！

無綫藝人高海寧（高ling）最近忙於拍攝劇集《網絡騙案》，豈料一場坐電單車尾的戲，卻令「高Ling」被車尾的死氣喉「辣」燶了一大片，她接受《香港01》電話訪問時說：「我都係第一次坐電單車尾咋！揩一揩就傷成咁喇！好在醫生話唔太嚴重，不過佢話我知如果hold多兩秒就會連皮都冇埋！」高ling更表示「辣」燶小腳的一幕只是當日拍攝的第一個鏡頭，該日還需要拍攝一場跳舞的戲份：「都冇辦法啦，好在佢哋都即時畀咗啲燙火膏我搽，嗰日我拍完就去睇醫生。」

最驚留疤　認真戒口

其實高ling對這種皮肉之苦並不在乎，但她最怕就是日後留疤：「醫生已經應承咗我會盡力令到我唔會有疤痕，所以叫我隔日就去洗傷口。我自己都好驚呀，所以都要戒口，例如唔食得豉油呀、牛肉呀、海鮮呢啲囉！但最慘係我喺屋企又唔小心整穿咗個水泡，希望唔會有事啦！」