【性敢中環】雨僑同jeana去夜場視察：見到啲男女激情親熱

雨僑今晚現身中環出席網劇《性敢中環》首映禮。雨僑透露在劇中會有段網絡情緣，但最終未能發展成為愛侶：「其實友情或愛情線，同我現實中好唔同，喺呢個年代發展得好急速，前排仲俾我啲姪女問我，我個年代嘅人點樣去識人？但呢個角色偏偏就係咁舊年代囉，就係喺網上面識咗個男仔，不過劇情會喺最尾個幾集就會知道呢個男仔身分，原來係我身邊嘅人。」

雨僑指入行前都有夜蒲，但不過唔多：「之前有拍過夜蒲系列嘅電影，試過同Jeana（何珮瑜）真係去過蘭桂坊啲夜場體驗，去觀察夜蒲嘅人動態，仲要係去過好幾次，夜場真係令我都幾眼界大開，試過見到啲男女好激情咁親熱，不過可能自己真係大咗，又結咗婚，更加唔會落夜場玩，最怕玩完之後把聲沙啞影響唱歌。」