【法證先鋒IV】下年一月先播　 監製梅小青：本來我哋係台慶劇

無綫今年在深宵時段重播三輯《法證先鋒》，目的好明顯是為今年播映的《法證先鋒IV》鋪路，當時一眾演員都非常期待，因為劇集台慶檔期播映，奪獎機會一定高唱入雲，可惜，因為安心事件，所以《法證先鋒IV》被迫重拍，總監製梅小青今日出席《法證先鋒IV》力臻完美再度出發記者會，表示自入行以來從未試過重拍，她說：「今次好得意，同埋係好寶貴嘅經驗，成千萬製作再重拍一部劇。咁公司都好好，好支持我哋套劇，亦多謝團隊同演員，佢哋一呼百應，好多謝。」另外心穎的角色由湯洛雯頂替，在劇本方面小青姐表示也有一定的改變：「我哋即時再執過劇本，因為有唔同嘅人有唔同嘅演繹，同埋有啲唔可能再拍得到，又有啲可以拍得更好，所以我哋力臻完美再度出發。」

能夠重拍當然值得開心，但播映檔期，就因為補拍而延遲了，小青姐續說：「本來我哋定係台慶劇播，但我哋要送檢，依家6月7月拍，咁又要後期剪接，原則上趕唔切今年，杜生話希望出年年頭播。」那就影響大了，要知道台慶頒獎禮多數12月中舉行，《法》第一女主角陳煒，原本食住這個勢頭絕對有力可同《鐵探》的惠英紅爭奪視后，可惜現在很大機會一月播映，可能已過了頒獎禮，當然頒獎禮亦試過一月舉行，但機會不大，《法證先鋒IV》有可能像《大帥哥》一樣，成為錯過頒獎禮的神劇。