【專訪】狄龍對電影仲有火：有啲人為賺錢拎好多垃圾炒埋一碟
電影《搭錯車》於1983年上映時獲獎無數，36年後以舞台劇形式在港演出，並由狄龍及閻奕格飾演劇中嘅父女角色。
身為電影編劇嘅黃百鳴表示《搭錯車》原先係一個喜劇，不過就在開鏡前夕，黃百鳴決定改成悲劇，並飛到台灣閉關48小時寫出完整的劇本，「因為新藝城早期以喜劇為主，嗰時我單純咁諗如果將悲劇做到三分鐘喊一喊係未可以work呢？《搭錯車》係我人生最快完成嘅一個劇本，而家睇返當然可以更好，但當時要趕工所以無辨法。」電影當年叫好又叫座，令黃百鳴接連開拍《何必有我》、《阿郎的故事》，並成就了周潤發、鄭則士做影帝。
《搭錯車》舞台劇再呈現 選角鎖定狄龍大哥
作品將以舞台劇呈現，黃百鳴以及舞台劇監製高志森都認為狄龍係不二之選。以經典去形容《搭》的狄龍表示：「而家社會進步，雖然易咗滿足，但心靈會係空虛，《搭》可以填補呢一部份，如果大家睇嗰陣會喊，咁證明你仲有感情同人性，佢哋搵我可能係因為發現我平時都好木納，其實我自己唔多講嘢係因為覺得言多必失。」身為劇中女主角嘅閻奕格，前年演出完《風雲5D音樂劇》孔慈一角後，彷彿開拓了新世界一樣，令她有信心挑戰《搭》阿美一角：「我唔會同電影中的阿美比較，因為每一個都係個體 ，但我覺得可以將自己嘅經歷加埋入去。」閻奕格表示雖然面對前輩或多或少會有壓力，但另一邊廂她認為如果一直留在comfort zone並非好事，可以將壓力變成動力，令自己可以做得更好。
狄龍批「電影寄生蟲」為錢愚弄觀眾
戲中的啞叔是名啞巴，靠撿瓶子為生嘅佢，某日喺路邊見到棄嬰阿美，決心要將對方撫養成人。阿美長大後雖然成了紅透半邊天嘅歌女，但與啞叔嘅距離卻愈來愈遠……問到已為人父嘅黃百鳴同狄龍可會跟兒子有距離感，黃百鳴慶幸與仔仔都係電影人，度劇本時少不免會有衝突，但絕對係正常。「拗先好，唔拗聽晒你講都未必係好事，而喺拗嘅過程中會有火花，同埋劇本係對事唔對人，所以唔會影響到感情。」訪問中，狄龍以鹹魚白菜去形容電影種類，並表示自己比較喜歡自然一點的題材：「有好多係刻意去扭曲或取重，博觀眾吸引，我成日都話我係電工，即係電影工作者，我唔想做電蟲，即係電影寄生蟲、拎好多垃圾嘢炒埋一碟去賺錢，養飽自己愚弄觀眾，咁係好可怕。」狄龍深明大家都需要搵食，但希望能夠做到合情合理，又拒絕評論香港影壇是否有大量的電蟲。
髪型 ：
Mike Ting @ HAiR （狄龍）、Haysses Ip @ HAiR（閻奕格）
化妝：
Josephine @ J LAB（狄龍） 、julie.H @J LAB（閻奕格）
服裝 ：
PENNYBLACK（閻奕格）
場地：
8度海逸酒店