【黃心穎許志安】梁裕恆再撐心穎爆真相：許志安唔會犯咁低級嘅錯

早前黃心穎與許志安被爆出於的士車廂激吻事件轟動全城，外界齊聲怒罵呢對出軌男女。不過落選港男，曾於IG大讚「心穎bb可愛靚女」的梁裕恆 （Flow Leung）卻竟然發表連番「偉論」力撐心穎，出post爆料，指心穎其實是事件中的受害者，她只不過是愛錯了人，誤信許志安會跟老婆鄭秀文 (Sammi) 離婚，所以才會跟對方在一起，是個一心追求愛情的女生。於是Flow即被網民鬧爆，被指抽水搏上位，然而他仍未肯收口，連日來繼續講唔停。

昨晚Flow又再出招發功，拍了一條短片放上youtube，並於facebook出post轉發該片，留言：「斷送了前途，但是問心無愧！真心膠。如大家仍要針對人，不針對事，我沒辦法！」大家就一齊來看看Flow如何「真心膠」。他強調要將事件的真相告訴大家，還講明：「無興趣追求真相可以離開，睇完繼續鬧我都無問題，對我完全無影響。」

今次Flow化身成金田一，質疑安心事件背後的陰謀論，他在片中提出了多個疑問，直指事件當中疑點重重，並非片中所見咁簡單，懷疑成件事是有人早有預謀，叫大家仔細想想和分析一下。他還將火頭辣向埋馬國明與Sammi身上，聲稱兩人於事後的反應言行不合情理。不過Flow在發放該片一個多小時後，就刪除了。

以下是Flow於片中所講的言論：

各位網友大家好，由我發表嗰篇文章之後，網上嘅論調開始有所改變，再唔係單純簡簡單單咁去講成件事對定錯，而係大家去尋求真相，因為成件事有好多唔合理地方，好值得大家去思考。

咁我以下落嚟拍呢段片嘅目的，就係講番個真相畀大家聽，有興趣追求真相嘅人可以留低，無興趣嘅人可以離開，或者睇完繼續鬧我都無問題，對我完全無影響。嚟緊我會問大家一啲問題，大家可以自己去思考一下，唔好淨係聽我去講，到最終我會畀番答案大家。

喺4月2號嗰晚，呢段關係已經發生咗兩年，有幾多人係知道呢件事，有幾多人係鬼？第1條。

第2條，樓下有幾多架的士喺度，佢哋上咗唔同的士，會唔會有唔同答案？唔同嘅結果出現呢？

第3條，車入面有4個角色，一個負責揸車嘅，一個係第三者，即係肥仔，無咗肥仔成件事能唔能夠成功呢？嗰個揸車嘅係咪又係單純係揸車咁簡單？香港所有車都係右軚，而所有車cam正常都係會影住左手邊，因為乘客通常都係喺左手邊上落，當晚許志安坐右手邊，點解個車cam一早會對住右手邊？佢點樣可以一早預先知道許志安會坐喺右手邊呢？車入面邊個角色做到呢件事？

一般普通人嚟講，都唔會喺的士攬攬錫錫，點解？即使無車cam喺度都好啦，因為始終有個第三者喺度，點解要咁做？而且佢哋係知名人士，許志安呢啲咁經驗豐富嘅藝人，正常唔會犯呢啲咁低級嘅錯誤，一定有原因。會唔會係個司機本身就係相熟、知道呢件事呢？

呢兩年嘅關係，知道呢件事嘅人其實有幾多呢？會唔會雙方嘅伴侶其實都知道呢件事呢？坊間有流傳佢哋嘅關係其實係默許咗嘅，鄭同許都默許咗大家出去玩，但係許會唔會有機會玩出咗真感情，會唔會係一方想報復呢？發生咗整件事後，最大得益係邊個？喺經濟上最大得益者，邊個宣傳大咗？邊個知名度高咗？邊個受人同情咗？

我相信問到呢度，大家心入面都有答案，大家開始知道成件事並唔係咁簡單嘅桃色事件。我係一個負責問問題嘅人，答案交番畀大家自己諗，呢個世界唔係每一樣嘢都有答案，但大家一定要識得去問問題。

發展到呢件事之後，許志安出嚟開記者招待會，佢話自己飲醉咗酒，色心起，佢嘗試將呢件事變做一段性愛關係，變咗一件桃色事件，絕對唔係！呢件事並唔係當日發生，並唔係大家所睇到嘅所謂嘅勾引、主動，因為關係已經一段時間，所以係唔存在勾引或者主動，大家去諗番清楚呢一點。

然後到鄭秀文嘅聲明、馬國明出嚟見記者，馬國明嘅態度，好似覆述緊一個第三者嘅事，完全睇唔出有任何傷心嘅，大家形容佢係一個好男人，我形容，大家從來都冇愛過，如果愛過，就係冷血㗎喇。同樣，鄭秀文亦都係吖，當晚就話捉住大家隻手，然後就話祈禱，然後就傾咗好多偈，大家有冇試過嬲過你老公？發生咗一個咁大嘅事件，即晚去原諒，有冇可能呀？會唔會只係一個公關嘅技巧，背後嘅原因係咩呢？會唔會係一啲商業嘅考慮呢？

點解我會企出嚟幫阿黃心穎，因為佢唔係賣，喺社會上、喺娛樂圈，呢啲事情係不斷發生嘅。喺娛樂圈發生咗好多咁嘅事情，係冇人追究過，但今次，全城都喺度咁『蝦』一個咁嘅女仔，點解？因為許志安冇樣？因為許志安冇錢？啲而家所謂嘅模範夫妻，曾經搞過人哋家庭、拆散人哋家庭，冇俾人話過，點解？因為佢咁就值得人尊敬、值得人欣賞？大家咁樣睇嘢㗎咩？而家係笑貧不笑娼㗎咩？的確係，真係而家好多人係咁。

好多人話我出嚟抽水，我知我咁樣講，可能以後連嘢都唔需要拍啦，我知道一定會俾網民不停咁圍攻，因為點解？因為大家唔思考、唔諗嘢、唔會追求真相㗎嘛！不過我亦都知道，好多都只不過係網絡打手，全部假account，空號嚟嘅，點解會有人想盡快平息呢一件事呢？都係一個商業考慮。咁慢慢已經有報章去報道，或者有網上評論員去越講越接近個真相，我相信好快會還我一個清白。

仲有Flow喺ig嘅相, 以及安心事件相關嘅相：