【大醬園】反派王吳岱融改邪歸正：終於做返一次好人

吳岱融（Hugo)今日（14/3）出席無綫劇集《大醬園》造型記者會。經常飾演奸角深入民心嘅Hugo，透露今次劇集中是飾演一位慈父角色，反而考起佢：「因為我係傳統嘅守業者，好照顧自己啲仔仔女女，係一名慈父絕對係一個好人，終於有機會做返一次好人，其實演反派係易過演正派，反派可以放盡去演，但正派喺語氣上某程要收住收住，咁所以有種感覺係仲難。」

此外，Hugo表示今年8月將會有屬於自己的新歌面世，還有一首歌曲《回去愛你十億秒》特別送畀太太（鍾淑慧）。Hugo直言：「首歌嘅意思係由二十歲唱到三十歲，係講到後生嘅時候比較曳，又成日同啲朋友出去玩呀，而忽略咗自己太太，咁所以送呢首歌畀太太，爭取時間同太太去旅行去玩，彌補之前冇做過嘅嘢。」