丁子朗做過廚房打雜　公開擇偶條件 ：唔要求識煮餸

丁子朗今日（4/3）出席在銅鑼灣舉行的「好情人烹飪証書課程發佈會」活動。丁子朗表示在加拿大讀書的時候，都有入廚經驗：「𠴱陣時做兼職賺外快，想生活開心啲，就走咗去餐廳做廚房打雜，起初做嘢做得唔好都會畀人鬧，都好辛苦，不過佢哋都好包容，之後就慢慢跟啲廚師學煮嘢食整早餐，最叻就係煎蛋，乜蛋我都識整，又會煮下公仔麵咁，𠴱陣時都做咗成年，不過呢啲經歷係開心嘅。」

至於將來另一半需唔需要識煮餸，丁子朗大開綠燈話：「我唔要求，其實由細到大我唔覺得女人要識煮餸，因為我阿媽都唔識煮餸，我阿媽連㩒電飯煲都唔識，試過有次工人姐姐放假，媽咪開罐頭俾我哋食，問我點樣煮飯，之後我同媽咪講：『算啦，等我去煮飯啦』。」