新年破食戒最希望食極唔肥 劉浩龍：曾經六日唰五底蘿蔔糕！
撰文：翁漢瓏
出版：更新：
劉浩龍（Wilfred）今日（27日）出席活動時表示自己近來忙於出新歌，新年之後亦會接拍新戲，可謂十分忙碌：「上年公司好好咁畀我自把自為做咗幾首奇奇怪怪嘅歌，今年決定乖乖地出翻劉浩龍式嘅情歌畀大家聽。過年之後都會拍套新戲，暫時可以同大家講嘅就係套電影屬於警匪題材，敬請期待！」
轉眼間農曆新年就到，Wilfred表示都係會同屋企人過：「今年都係陪吓屋企人，周圍拜年咁，最重要係終於可以食返蘿蔔糕，上年因為減肥我只係食咗一小塊，但其實我以前鍾意到會食五底咁多！」但大開吃戒，真的不怕肥？Wilfred則笑言：「所以我今年第一個願望就係食極唔肥！但其實我都有問過自己嘅健身教練，佢就話我依家呢個進度係可以食多啲野都唔怕肥。」