【開心速遞】家中女傭是「殺花勝手」　滕麗名：唔淋水又死淋又死

滕麗名今日（26/1）現身黃大仙舉行的《愛·回家之開心速遞》「鄰舍團年飯」活動賀新春。提到農曆新年將至，滕麗名便指「斷捨離」時間又到：「我會大清潔，因為成日都要開工，屋企累積咗太多嘢，所以一定要大掃除，我計過唔着嘅衫都有幾大袋，我會拎去捐咗佢又環保。」

過年前阿滕都會為家居添置鮮花擺設，但令阿滕大為頭痛是家有位「殺花勝手」：「我唔知點解屋企個姐姐（女傭），可以將啲花淋死㗎，唔淋又死淋又死，總之係咪都死，所以我會同姐姐講唔好掂啲花，可以保佢命，多多一個星期左右，所以我一去旅行就保佢唔到啦，所以我祝願佢可以等到我返嚟啦！」