【有片】撐男友升呢做業主　馮盈盈有份畀首期：會考慮搬入去住！

馮盈盈今日（4日）到銅鑼灣出席韓國著名護膚品牌活動，自言讀書時曾用錯護膚品導致敏感，幸好沒有大礙，往後便學識選用適合自己的產品。盈盈早前在《萬千星輝頒獎典禮2018》勇奪「飛躍進步女藝員」，風頭一時無兩，難接廣告活動亦越接越多。提到同獲提名的麥明詩亦搞笑地公開呼籲她「讓路」獎項，可惜由盈盈跑出搶先一步得獎，問有否被對方投訴？盈盈表示：「前兩日我約咗佢出嚟請佢請飯，表達對大家嘅多謝，當晚我攞獎佢都有衷心祝福我、恭喜我，完全冇假意嘅心。」

盈盈男友「寶寶」最近置業做業主，但日兩人為新居裝修添傢俬大為忙碌，盈盈表示：「雖然新居自己冇名，但要澄清佢置業的首期有部份我都有出，雖然唔夠佢多，所以都是大家努力經營嘅成果。」被問到男友置業是否為結婚作準備？盈盈否認：「搬入去住係會考慮，因為返工比較方便，因為有時收工太夜作息唔定時，會影響依家嘅屋企人，所以搬出嚟住會好啲，結婚短時間就唔會諗住啦，因為買咗樓冇錢呀。」