秦嵐做內衣品牌代言人　用仙氣取代性感

秦嵐去年憑劇集《延禧攻略》爆紅後，其減齡穿搭不時都引起網友討論，而秦嵐近日又因內衣代言而成為微博熱搜。

事關秦嵐曾接受訪問時表示不喜歡特別暴露，平時亦少穿性感服飾，甚至會親自出手將性感禮服deep v部分縫起，之不過，看似保守嘅秦嵐早前就拍咗輯內衣廣告，廣告片段中，秦嵐雖然係以內衣上陣，但就配上一件外套，再加上大部分鏡頭都係影住秦嵐個靚樣同長腿，令真正要sell嘅內衣變得十分「低調」，甚而有網友以為呢個係唇膏廣告。

雖然「事業線」曇花一現，但相信對秦嵐嚟講，已經係跨出人生一大步。但唔少網友都十分質疑，既然秦嵐平時衣著打扮都咁保守，點解要接內衣廣告呢？情況就好似秦嵐早年曾經話過要抵制皮草，但轉個頭又接下皮草品牌代言。不過，唔少粉絲都認為「工作是工作」、「不喜歡性感就不能接內衣廣告嗎？」更大讚秦嵐於廣告中充滿女人味。