王祖藍陪李亞男入產房：輕鬆到好似整水晶甲咁

剛為人父嘅王祖藍，今午(22日）完成首場音樂劇《唯獨祢是王II》之後，不忘與傳媒分享喜悅，祖藍透露囡囡17號出生時，自己都有跟埋入產房剪臍帶。「其實醫生已經剪好咗，我都係剪埋少少，因為老婆當時好輕鬆，我好似陪埋佢整水晶拍甲一樣。」至於囡囡的英文Gabrielle，祖藍話係老婆李亞男改，並笑言名字予人高貴的感覺，自己要著西著先敢叫，至於囡囡的中文名暫時未有，但想同舞台劇或音樂劇有關，並呼籲大家多多提議。「因為老婆陀佢嗰陣，比流行音樂佢聽係無反應，反而佢一聽音樂劇就係咁踢。」

祖藍透露等老婆坐完月之後，應該會飛去日本旅作為獎勵，但問到屆時會否唔捨得愛女，祖藍話都幾大可能，但他亦都覺得，就算有小朋友，都依然係要維持夫妻恩愛關係、得閒就要拍拖。「其實見到個女都感動，但唔係好敢抱，因為一抱就會想喊、會傷聲，不過今朝有抱咗一下，同埋應承佢做完音樂劇之後，會好好抱住佢大喊一場。」