【十大中文金曲】巨星幫「好朋友」同奪獎　坤哥胡鴻鈞淵源變孽緣

《第四十一屆十大中文金曲》頒獎禮在昨日（12月17日）於香港知專設計學院綜藝館舉行，同時亦頒發了「十大中文金曲」等多個獎項。隨著這張樂壇首個成績表的派發，亦即代表著歌手們的努力下的回報。當然，這張成績表也是對歌手們的鼓勵，令他們堅持下去的其中一個原因。

今屆吳業坤（坤哥）與胡鴻鈞（Hubert）分別以《孝順》和《到此一遊》奪得「十大中文金曲」的第九位及第十位。胡鴻鈞接受《香港01》訪問時，表示對得到獎項感到驚訝。「真係好估唔到，因為首歌經歷咗年幾，得到獎其實係幾有意義。同埋啱啱坤哥都有講，我哋好有淵源。」坤哥馬上補充說：「孽緣，因為吳業坤吖嘛。（同音）」胡鴻鈞續說：「一齊玩巨星啦，又一齊喺相同道路上打拼，好似整定去到某個階段都畀我哋嚟一個回顧咁。同時又係第九位、第十位，又可以企埋一齊，係一個緣份嚟嘅。」