【早霸王】好心教路追女反被男聽眾指責　森美：個女仔都幾陰功

上星期森美於《早霸王》接到男聽眾Carlos電話，由於Carlos對於表白成功都唔係太有把握，於是森美決定比多一星期時間佢，而且仲教埋佢點試探對方，都算唔話得。

Carlos心儀對象係朋友同事，由於朋友以「無拍拖」同「好索」做賣點，Carlos為求真相，於是就決定去呢個女仔打工嘅餅店睇睇。結果係點？佢話：「索呀！靚 ！仲要斯文。」森美聽到之後，馬上教路點先可以同對方變熟，例如係讚佢笑容親切，但Carlos認為可以透過朋友得到女方電話，並透露之前已經同過對方出街。「嗰次都幾難忘，因為佢塞車遅咗一個鐘，佢有WhatsApp我話會盡快嚟到。」Carlos話聽到「盡快嚟到」之後，產生無限遐想，例如係呢個女仔可以同佢有更長遠嘅發展，正當森美小儀都好費解點解Carlos會有咁嘅諗法時，佢就話：「我自high啫。」呢位男聽眾嘅風趣幽默真係不得了。Carlos指由於女方甩拖無耐，所以自己都唔係好有把握。森美於是提議：「你試下呢個星期問佢關於以前男友、愛情嘢，留意佢一舉一動，講下將來，睇佢有咩反應。」

一星期後，森美再次接通Carlos，佢真係有跟足森美指引去做，但當女方提到希望將來可以買樓、照顧父母、有多餘錢去旅行時，Carlos就好唔識趣咁話：「唔使買層樓都可以做呢啲野。」不過，原來好戲在後頭，Carlos話生日當日約咗女方去食飯，見對方無準備禮物，於是佢就話：「你錫我一啖，咁咪就係禮物囉。」森美聽到呢度，都不禁嘆氣表示：「你真係不顧一切。」直指佢太過急進。Carlos之後再話：「佢有少少驚同唔肯，但最後都鍚咗啖。」點解可以咁峰迴路轉？原來係Carlos同女方去到地鐵站時，使出壁咚呢一招，兼且再一次表明：「唔准走，面珠墩都鍚啖先啦。」Carlos話女方鍚完佢之後，當晚收到對方短訊，內容大概係話Carlos令佢好尷尬，並同時向佢發出「好人卡」。「我之前用銀紙摺咗個心俾佢，佢嗰晚攝返比我。我以為衰咗，但佢之後又有搵我傾閒計……」同Carlos傾咗兩個星期電話，森美雖然大讚佢好笑，但就認為：「要接受佢呢種有趣，女仔都幾陰功，做佢老婆或女友都要有一番智慧。」

森美係打比女方前，教Carlos使出「以退為進」，連台詞都度埋比佢，點知電話接通女主角－－兆儀後，Carlos一句唔記得，隨即亂噏一通，仲叫對方今個禮拜去飲茶，搞到兆儀都忍唔住問咗句：「咁你使咩打上嚟講?」，Carlos於是轉返入正題：「我諗住同你講，唔知點解好鍾意你，佢哋叫我退一步，但我唔想，做人係要進步，right？（佢哋）唔知係未傻?如果你都鍾意我，商台全體上下都好開心。」呢個到底係未表白？相信連兆儀都分唔出，好直接咁問Carlos：「你係未喺度玩緊我？你介唔介意轉頭再打比我？我返緊工。」為免呢個表白機會泡湯，森美把握機會問兆儀，而Carlos亦再講多次：「我問你有無少少冧我？」但兆儀繼續逃避，仲話晏少少私下打比Carlos，到底呢個表白結果係點？相信都係無望。