陳華鑫子宮頸短瞓床至36周　順產誕6磅幾囡囡：生完面對另一問題

懷孕嘅十個月對媽媽來說，既幸福亦面對住一個個難關，生產過程危險重重，生完要2個鐘餵一次奶無限輪迴，但見到BB一日一日長大所有事都值得。喺台慶劇《是咁的，法官閣下》中飾演實習律師嘅前港姐陳華鑫（Gloria）呢日喺網上報喜，囡囡已經順利出世啦﹗佢接受《香港01》訪問時透露：「生產時好順利，但生完之後就插尿喉足足個幾星期。」

Gloria喺IG上載囡囡嘅相留言話：「我們家的小公主出黎過聖誕節﹗終於見到妳，好彩妳足磅。」點解媽媽咁擔心呢，因為懷孕中後期醫生已經話佢子宮頸短，需要瞓床休息直至生得，如果唔係會有早產危機：「我上星期生，31周時醫生已經話我開咗一度（即產程開始十度就可以生BB），之前我由31周開始瞓床到去36週順產生咗佢出嚟，成個孕期BB唔算好吸收，大部分重喺我身上，所以囡囡出世有6磅5安士，無問題好健康自己總算放心。」

順產生完之後原來Gloria苦難仲未完結：「我由陣痛到生用左4個鐘，算係好快，老公全程陪住同親手剪臍帶。但生完之後我去唔到小便，要插尿喉插左個幾星期，到今日先拆喉。但係都未好似之前去得咁暢順，要慢慢train up番。傷口又痛，尿喉又痛，BB又兩個鐘要食一次奶，諗返起都辛苦。」

順產後要插尿喉咁耐實在唔太常見，Gloria都有分享自己經驗：「因為31週BB個頭已經好低好低，醫生話已經開咗一度，可以隨時生！咁佢就壓住左我膀胱壓左好耐，變咗生完又面對多一個問題囉。特別感謝番我個主診杜堅能醫生，由大肚時到生產果刻都好用心照顧住我。」依家拆咗尿喉Gloria都無得好好休息，因為堅持餵人奶要每兩個鐘埋身，不過見到囡囡食飽後嘅滿足樣，一切都值得啦。